Mattis Kleppen & Knut Reiersrud + Andrea Søgnen
Laurdag 9. august 2025
Konsertlåven i Nordbøvegen 10, kl. 15:00
335,- inkl. bill.avg.

Strengemagi på Konsertlåven
Strengemagikarane Mattis Kleppen og Knut Reiersrud møtast på scenen for å skape det som garantert vert ei musikalsk høgtidsstund i lag. Det er faktisk første gong desse fantastiske to musikarane deler scene, og forventningane er naturleg nok høge.

Mattis Kleppen, kjent for sitt unike slåttespel på bass, har lenge vore ein viktig og ettertrakta musikar på den norske jazz- og folkemusikk-scena. Knut Reiersrud er ein gitarist med eit heilt unikt særpreg, og han leikar seg med både blues, rock, folkemusikk og improvisasjon! Begge to har ein distinkt og sjelfull tone og ein improvisatorisk friheit som opnar for uventa musikalske vendingar. Denne konserten er eit møte mellom to sterke personlegdomar i musikkverda – to artistar som både kan spele med djup uttrykksevne og med glitrande teknikk, men også utforske det ukjende gjennom improvisasjon og spontanitet.  Når dei møtast i Konsertlåven vil det ikkje berre vere ei konsertoppleving, men ei høgtidsstund med utforsking av kvarandre sine musikalske univers!

Andrea Søgnen opnar!
Før konserten med Mattis Kleppen og Knut Reiersrud vert det oppvarming med Andrea Søgnen. Andrea Søgnen frå Hallingdal representerer neste generasjon langeleikutøvarar. Andrea speler primært  slåttar i Hallingdal-tradisjon, men har òg repertoar frå Valdres og Telemark. Ho har stor interesse for overføring av slåttar frå hardingfele og kveding til langeleiken, og arbeider med å utvikle og vidareføre både eldre og nyare spelestil med mål om å framheve større delar av instrumentet sine klangar og moglegheiter.

Medverkande:
Andrea Søgnen – langeleik
Knut Reiersrud – gitarar
Mattis Kleppen – bass